وحق البير واهله وسدرته ومايه
ما باللعب تشكم يابن الولايه

ما باللعب تشكم يالردت تلعب
والباطول ما هي بكيفه لو يتعب
شنيكك صاح لو انته صحت طنّب
أؤورطكم واطنّب واوصل الغايه

ادج دج التتن وادبج بتالي الليل
وانزل نزلة المعتام حيل وحيل
ازابك مثل زيبك واحجي ميل الميل
حسجة وبس باهلها تجيس الحجايه

اذرع شارع الصادق الف مرة
واجيب شهود من البير والسدره
واخلي الشيب شعره تلوذ بالشعره
خجل من ديرم الشفه والمرايه

ولك ما حسبت بالوكت هيج حساب
صعلوك الجديدة يصير إلي طلاّب
بس ياحيف دنيانه اصبحت تنعاب
تضحك لك لجن تنغز بسلايه

دنيانه الذي عل العيب من شابت
راب الماي بيها وهيه ما تابت
اشكال ألوان حبلت بيهم وجابت
ومن شيبت شالت بالعرب رايه

شالت بالعرب رايه ولفت تحدي
بيها يجدّي المجدّي من المجدّي
الله يرحم ايام التمر والزهدي
ونوم الضحه بسِد رِجْلِ المحنايه

عفرين على دنيانا شكثر ثوله
تتكلب مثل جلمة المكيوله
سولتها المدافع غسل من سوله
شيب وعيب بيها وناقصة ربايه

عفرين على دنيانه شتربي كروش
بيها الخَلَك لومنتوش لو منفوش
كالوا شرهت الجزمة على الكالوش
وابو الأصبع اتحالف وي نعل تايه

يمحمد الك شكواي يمحمد
يالظنيت بيك الوكت يتجدد
ما خيبت ظني البير الك يشهد
صح رايك يمن كل وكت صح رايه

ردنه البير يمحمد تجيّة روح
وما ردنه الروايح بالاسامي تفوح
وردنه انصيح الك رنّه يجدر الفوح
ونحجي بضيم أهلنا وضيم الولاية

صدر البير يمحمد أظن ياسع
وجلمة عتب ويه الدثو ما تنفع
تدريني ذهب من ينجلي يلمع
وادريبك أصيل وبالكرم آية

انا بحكمك رضيت وانته لي مقياس
يالشيمتك بالسكته تعرف الناس
المومن ما جذب لا والله والعباس
ما عال بصديج ولا عبر ثايه