الاسم: ---- 
مو من الثلمة جوابا على رد صعلوك الجديدة
عجد حبل الشرايع
عجد حبل الشرايع وانتخه للبير
صعلوك الجديدة الحادته نواطير
شجابك للجديدة شلون منها تصير
وانته البلعمارة جان الك تدبير
تدبير وفراسة وحنكة واستفهام
تمشي والعلم مرفوع ليجدام
لو تنسه اذكرك بالمخيط خام
واسولف عن خبز لبنان ليش فطير
ترف ابيض مدور ما يريد غموس
تنوره بورد مشجور موش سبوس
غم بختي الذي من الزغر منحوس
اطحن والطحين يرد عليّ شعير
طريت العجود محزم حزامين
ظهرية وشمس ومعزلة الصوبين
بلجن غفل تلجحني وسيعة عين
واكسر خاطر الشّفه بمساء الخير
ولمن ايسيت من المدارس عاد
كمت افترعلى الحلوات لببغداد
يصعلوك الجديدة والجرالي غاد
تدريبه كلف ميفيد بيه تفكير
رديت بحمل ضيم ودبل طابوك
حظي ليه حدر والغشمة صارت فوك
والله لو صفت الا اطيح فتوك
واغرف بالنجانه واكسر الجفجير
ياجفجير ينفع لو صفت دنياي
اسوي المرك بالثلمة شبيه الماي
واطبخ تمن وقيمة ووزع جاي
من الفاو واوصل ساحة التحرير
بس يا حيف دنيانا شيصفيها
الوادم حايرة ومحد يدليها
ماتعرف عدوها المنها والبيها
وحكها لو كلت بالنايبات تحير
عركه البين بيت صفوك وبيت شياع
الدوّت من سنين موجّره لساع
شمرت زقرت والسبّه علشبر الكاع
مو بس عَ السكملي الفرح بالتغيير
صاحب لا تكلي والسكملي شبيه
كلها تريد تتصدر يخويه عليه
مكاون والمكاون جا شني تاليه
احنه والسكملي جومة مكاسير
صاحب والعقل لو راح ما ينرد
وباب اللي يفتحه الكون ما ينسد
وين اهلي الذي بيها اليزل يرشد
جي لن الزغير البيها عنده جبير
موش تياه كلمن ما يردّه رباه
لابد اله جبير الينحجي وياه
لو ناموس اهلنا طاح وتلكاه
اليرضع بالدوابة واليسوك بعير
الك رب اليرحمك يابلد مضيوم
جم دوب الجتل وياك عايش دوم
من طف كربله ما هودت لليوم
وانشد لو نشدت الصدك ماي البير
مو من الثلمة
29 / 3 / 2008
كتبها ---- في 12:12 مساءً ::
يا حبذا مومن الثلمة غير مفرتي مكاون بــ معارك لان مكاون تلعب روحي وتسوي عندي جالي القصيدة لاباس بها لكنها تذكرني بالعشرينات من القرن المنصرم رغم ان كاتبها يدعي الشباب يوميا وتفصيليا المهم القصيدة من المعلقات الشعبية التي يفتخر بها شعرنا الشعبي الذي ضاعت مراكبه بين مدع وشويعر بورك مومن الثلمة على هذه الرائعة واعتقد ان صعلوك الجديدة سيرد متاخرا بحجة وعثاء السفر وما الم به من مرض طارئ اعاقه عن حتى متابعة اخبار الطراكيع التي تلم بوطنه الام ولكن له عتب على مدير الموسوعة المبجل وهو لماذا لم ينشر القصيدة في الارسي العظيم باعتبارها جامعة لخواص الدلالة الايحائية التي تاطر مسارب الصورة بتفاصيل غارقة بدوالغ جمة هنا يحاول الشاعر عرقلة المسيرة المتانقة لشعر الكينونة الصارمة باعتبار ان مسايرة الشائع من القوانين الشعرية تجنب صاحبها امراض مزمنة لعقدة شني السالفة بورك النهار ومزيدا من الاشياء اللطيفة
عن صعلوك الجديدة لفيف من المعجبات المثقفات
لا حاجة ان يعتذر مومن الثلمة عن استخدام مفردة المكاون لأن هذه الكلمة عربية صريحة وقد وردت كثيرا في الشعر الشعبي العراقي واذا كان نغل العوجة قد استخدمها قبلا فلا يعني حذفها من اللغة فهو اهون علينا من ان يحذف مفردة من تاريخ العراق ولهجته الشعبية الرقيقة الحلوة على العموم قصيدة مومن الثلمة من الروائع الشعبية حقيقة وننتظر الرد من صعلوك الجديدة ورحم الله والديكم على هذا التحشيش وهذا التصعلك
ابو عباس شاعر شعبي ينتظر الدعوة للمشاركة / النجف / حي الحسين .
ابو عباس الورده
رغم ان ادارة الموسوعة كانت تعتبر الشعر الشعبي تقهقرا حضاريا ودعوات للادب الاقليمي الضيق الا اننا وبعد السقوط المريع للنظام البدوي الضارب في جذوره العفنه من نجد الى يمن وبعد ان كشرت انياب المستعربة الاراذل عن نزعتها في االابادة الشاملة لنا
تخلينا ولله الحمد عن ذلك الهاجس الكاذب والاعتقاد الموهوم باننا يجب ان نكتب أخذين بالاعتبار ايصال الفكرة الى شعوب اعمى بصيرتها الحقد والكراهيه
غرد واسمعنا
نحن بالانتظار
- الادارة -