سليم – اللي ينسه ينسه فد مره يا أبو راهي ... ما يعلق شي بشي ... والحياة بيها أخذ وعطا .. ويكولون الفات مات

مجبل – أستاذ سليم آني رجال قروي على كد حالي وأنته ما شاء الله أستاذ ومتعلم ودارس بأحسن الجامعات والكليات على كيفك ويانه

سليم – أوضحلك أكثر ... ثاركم اللي أنفصل وراح ... وراحت سنينه ... شيكول أبو راهي عنه وآني أعرف أبو راهي جلماته حك

مجبل – هذا الحجي صارله اسنين استاذ

سليم – أريد أعرف أكو أثر باقي منه لو لا

مجبل – اللي بالنفوس محفور ما ينمحي يا أستاذ بس؟!

سليم – بس السانيه حكمت وصارت وديعه عدكم وما ..

مجبل – أكول أستاذ حجيك حجي واحد مكلف لو حجي فاعل خير

سليم – شتفرق عندك يا أبو راهي

مجبل – تفرق هوايه

سليم – نورني

مجبل – إذا مكلفينك ردي عليك أحنه حكنه وصل وما عدنه حك أضافي على اللي فرضته الناس اللي حضرت

سليم – وإذا أني جايك بصفتي فاعل خير

مجبل – فاعل الخير كون إله سبب ... وشايف شي جدامه شنهي اللي شفته ردي من عدنه وتريد أتصلحه بخير حضرة المدير

سليم – أستغفر الله أبو راهي أنته دتحرجني بهذي الحديه اللي تخاطبني بيها ... حشاك من الردي والموزين أبو راهي أنته أهل المكرمه والخير ... وآني طمعان بزود خيرك

مجبل – أبشر وآنه أخوك ويمينك أستاد ... بس كلي أنته شتريد وأصدك وياي

سليم – آنه أكول الضغينه راح وكته والعمر دولابه دوار يا أبو راهي والوكت صار غير وكت ... وهاي دنيا والشواهد بالتاريخ جدامنه هوايه اليضمر أبكلبه شي لا بد ما يجي يوم ويطلع هذا الشي إذا خير عم وإذا شر أيضاً عم ... خلينه بالخير أبو راهي

مجبل – الله بالخير عليك

سليم – الله بالخير والعافيه

سليم – نحجيها عدله وطك بطك ... نسبانكم

مجبل – قصدك أهل هالحرمه مرة عذاب شنهي اللي يردوه من عدنه

سليم – الأمان ... اللهم وللوديعه اللي عايشه بكنفكم ... آني استغرب ياأبو راهي ... أنته دوم أتبادر بكل معروف

مجبل – الدم ياأستاد الدم

سليم – حجت الناس وفصلت وأنظلم بيها بشر الخافيه يابو راهي ... الناس ماده أيده ... بس أيكولون أكو خافيه ... وآني وعدتهم وكلتلهم هذا الرجال بيه كل الخير

مجبل – أبشر وآنه أخوك ... ما يصير خاطرك إلا طيب

سليم – والنعم من أبو راهي .... أبشر ؟!

مجبل – أبشر وبشر بالخير ... وأنته محضرك محضر خير يا أستاد

"ينبه السركال ... على أن يتبعه" أمشي ولك روح أجمعلي الربع

سليم – أبو راهي آني أترخص عندي اليوم هوايه أمور متعلقه أحب أنتهي منها

مجبل – مكضيه أنشالله

سليم – في امان الله

مجبل – في أمان الله

"يدخل عذاب مسرعاً والشرر يتطاير من عينيه"

عذاب – الحك يابو راهي

مجبل – خير يعذاب شكو أشوفك مهم

عذاب – اللي ردناه صار يا بو راهي ... وأسيرك موجود

مجبل – منهو ولك عذاب

عذاب – الأستاذ أبو الأمن المتحده ... أبو حقوق النسوان

مجبل – أستاذ حامد

عذاب – أسمه موش حامد أسمه مشكور أخو وردة

مجبل – أنا أخوك ... بعد كل هاي السنين هسه يا الله تصح الفرصه

عذاب – المهم صحت وزهت يا أبو راهي ... أوامرك محفوظ

مجبل – عذاب ... آني نطيت وعد لمدير الناحيه

عذاب – عليش

مجبل – آمنت الناس والوعد مرهون بشاربي وشواربكم

عذاب – 15 سنة وأحنه ننطر هذا اليوم ... هسه تكلي نطيت وعد ... لا يا بو راهي لا هذي غلبه لشواربنا ... يضحك علينه ... مشكور ... يجينه متنكر بثوب الإنسانية والأمن المتحدة .. حمامة سلام عود هو ... مشكور راد يضحك عليك يا بو راهي

مجبل – آنه أبوك يراهي ... لا والله ما يضحك عليه العايل بدمنه ... صفوك

صفوك – بلي محفوظ ... روح ويه عمك عذاب وزهب الحفره اللي وره الطبر ... وأريد مشكور اليوم يبات بيها

مجبل – أسمع ولك صفوك وأنته يعذاب .. ما أريد واحد يدري بالسالفه ... وبالأخص وردة ما ريدها تشم خبر لا هي ولا بتها

صفوك – أمرك محفوظ

مجبل – آني أنطركم بالمضيف ردولي خبره بساع

عذاب – أبشر يا أبو راهي

"يخرج الجميع"

"يدخل خضير وهذّال ... وهما يتحسسان الطريق ويشيران الى مشكور ووردة بالقدوم .. تدخل وردة ومشكور وأمل"

مشكور – خويه وردة أنتي متأكده من حسن نية هذوله الثنين

وردة – منهو خضير وهذّال .. هذوله همه اللي سعوا يم مدير الناحيه بسالفتنه

مشكور – يعني مأمنه منهم

أمل – هذوله من عدنه بينه

وردة – وبعدين أنته خويه ما بقالك شي هنا روح بشر أهلي بوعد مجبل اللي وعد بيه مدير الناحيه ... وإنشاء الله ترد إلنه ماشي على طولك وراسك فوك كل الروس

مشكور – أرخصوني خل أروح

وردة – الله وياك ... مودع ومحروس بعين الزهره الزجيه

أمل – مع السلامه خالي

مشكور – في أمان الله

"يغادر"

وردة – "تشيعه بنظراتها" خضير، ملّه هذّال .. ديروا بالكم عليه

صوت خضير – عد عيناج أم أمل "يختفي الجميع عدا وردة وأمل"

وردة – ما أدري ليش كلبي لاجمني

"صوت إطلاق نار صرخات ... بطلب التوقف هذال يقطع المسرح هارباً من الجهة الأخرى خضير يتبعه ممزق الثياب ... تستمر أصوات الصراخ .. ليتضح أن مشكور وقع بيد عذاب والسركال وردة وأمل يغلبهما البكاء يهرعن صوب الجهة التي حدث بها الأشتباك ثم يرجعن دون أن يعرفن الخبر ... يتجهن صوب هذّال وخضير ... يعود هذّال وهو يتألم وقد كسرت نظارته السوداء بينما خضير يتفحص ثيابه الممزقة..."

خضير – يا بويه ... ولكم غاره .. غاره

هذّال – منهو

وردة – أخوي وينه خضير

خضير – أش ... شالته الملايكه .. يمي جان جاي أسلم عليه وأكله أودعناكم ... ما شوف إلا عشر أدين شالنه للسمه وأخذنه هناك وما أحس إلا وهدومي مملخه

أمل – ملّه هذّال وأنته إشفت خالي وينه

هذّال – ليش هو اللي يشوف شاف شي حتى آني أشوف يمكن أخمس مال برنو طر نظارتي ولكم خشمي وينه .. "يلمس أنفه" آخ

وردة – أخوي راح .. وكع بيد الظّلام ... أخوي راح يهذّال ... أخوي راح يا خضير ... ولكم يا ناس يا عالم يمه أمل خالج راح :تحتضن كل واحدة منهمم الأخرى ويجهشن بالبكاء ... بعدها تنطلق وردة مهرولة وهي تصرخ" عذاب .... عذاب"

أمل – أخذيني وياج يمه

"يخرجن من المسرح"

هذّال – ولك خضير يا هو العملها ... ما تكلي أشصار

خضير – هذا اللي صار جدامك

هذّال – هو آني شفت شي الضربه ثولتني

خضير – أنته حكك ما دخلت معركة بالسلاح الأبيض

هذّال – يا سلاح أبيض يا خضير ... هسه أنته عاد مسويها خريط للمعارك

خضير – أها .. شوف ملّه وداعتك جبتها من الشمال للجنوب هجوم يطر هجوم

هذّال – ولك خلنه بالزلمه اللي راح من إدينه ... أشلون وين ننطي وجوهنه المن نروح

خضير – مالهه غير أستاد سليم مدير النايحه

هذّال – الناحيه

خضير – هسه قابل عدنه إمتحان وكل ساع تصلحلي أمش خلي نلحك عليه قبل لا يجتلونه "يهب الأثنين" "يدخل مجبل وسليم والسركال وعذاب"

سليم – جلمات وعدك الي يا أبو راهي بعدها حارة

مجبل – شنو قصدك استاد

سليم – مشكور وين

مجبل – يا مشكور

سليم – قصدي أستاد حامد موظف منظمة حقوق الإنسان

مجبل – حامد لو مشكور

سليم – نطيت الأمان وما أمنت يا أبو راهي

مجبل – آني كلشي ما أفتهمت

سليم – أبو راهي أكو شخص أختفى بفعل فاعل واللي هو نسيبكم مشكور واللي جان معروف بأسم حامد اللي أرجوه منك تطلب من ابناء عشيرتك المحافظة على حياته .. هذا وعدك اللي

مجبل – آني عد وعدي وكلامي ... لاجن مو ويه الحجايه السايبه

سليم – أفهم من كلامك مشكور عندك

مجبل – حرام إذا أعرف شي عنه

سليم – أبو راهي ... الشيطان شاطر ... لا تترك مجال لليتصيدون بالماي العكر ... الغضب لحظات ويزول لكن آثاره ما تنمحي ... وغلطة العاقل جبيرة يا أبو راهي أرجوك

مجبل – أستاد وروح أبوك آني ما أعرف عليمن ولا إلمن تقصد الله وكيلك جاي احس بروحي أطرش بزفه

سليم – أبو راهي يعني أفهم من كلامك  ماعندك علم بمصير مشكور

مجبل – أيدي بيدك خلي نروح ندور عليه

"صوت وردة يأتي من بعيد ... تدخل مع أبنتها أمل"

وردة – راضيه بكل شي راضيه بس خلو أخوي يعيش ... رهنت عمري بظلم عذاب حتى أخوتي وأهلي يعيشون بأمان وأدري ... أدري يبو راهي بينك وبين عذاب دسيسه أدري بيكم ما تنسون ثاركم ... أخوي مشكور وينه وين وديتوه

مجبل – أسمعي يا حرمه هذا اللي تحجين عنه آني لا شايفه ولا أعرفه ... وحجي زايد ماريد ترى أخلي عذاب يكسر راسج

وردة – قابله باللي تسوه بيه بس أنطوني أخوي

مجبل – أخوج شعنده يمنه ... وأشجابه لهنا

وردة – "تتجه صوب المدير" حضرة المدير سايمه عليك أخو زينب أخوي مشكور وينه مو جان أهنا ويانه ... آنه أريد أخوي منك حضرة المدير

سليم – مشكور أتسرع وآني لو أعرف بالسالفه من أول جان ما خليته يجي لهنا

وردة – آني السبب .. سوده بوجهي راح مني أخوي راح

سليم – أم أمل أنتي كل ذنب ما إلج السبب معروف وواضح بس مع الأسف ... "ينظر بإتجاه مجبل"

مجبل – أسمع أستاذ أنته أهنا مدير ناحيه وبس ... دورك تدير أمور الناحيه ... يعني أنته رجل عينته الدولة لخدمة الناس أي صفة أخرى ما إلك صار معلوم

سليم – صار معلوم شيخ مجبل وبصفتي مدير ناحية لازم أحافظ على أمن الناس الموجودين أهنا وأمن الموظفين اللي يشتغلون بالناحية وبصفتي مدير أيضاً أوجهلك أتهام بأختفاء المدعو مشكور وأطالبك بالحفاظ على حياته وأحملك المسؤولية كل المسؤولية لو حدث على حياته شي ...

أمل – أي أستاد الله ينصرك على كل ظالم ... حياة خالي مشكور أمانة بشاربك

سليم – "ينظر نظرة تحدي الى مجبل" أطمئنوا مشكور بخير ومحد يكدر يمسه بسوء

"يخرج مجبل غاضباً يدخل هذّال وخضير"

هذّال – ماكو ما إله كل أثر ... فص ملح وذاب

خضير – أي والله فص ملح وذاب ... ما خلينه مكان لو زويه ما دورنه بيها ... البياره خميناها بير بير ... البيادر كلهن خميناهن جوام التبن والبوه ... ماكو ما إله كل أثر

هذّال – بلكي راح يشرب ببسي من الكهوه اللي على الشارع العام

خضير – ولك يا ببسي أنته أعمى العيون ... مشكور أنخطف خطف من بيناتنه

هذّال – أشمدريني وين أشوف آني حتى أعرف أنخطف لو ما أنخطف

سليم – يا جماعه أني أكدر أنفذ تهديداتي وأستخدم صلاحياتي كمدير ناحية بس هاي الإجراءات تشكل خطر على حياة مشكور ... سمعوني زين لازم نتحرك وبأسرع ما يمكن على 3 أشخاص وأعتقد أختفاء مشكور مرتبط بهذولي الثلاثة مجبل وعذاب والسركال مال الشيخ اللي أسمه

هذّال – صفوك ... يا صفوك

خضير – أي صفوك جا شسمه

سليم – راقبولي ذولي الثلاثة ... وإنتي بنتي أمل حاولي ويه أبوج بلكي تلينين كلبه ... فهميه أنه هذا خالج وهو ما إله ذنب باللي صار قبل خمستعش سنة

خضير – والله آني أكول لو نخابر الشرطة

هذّال – مو هذا مدير الدنيا كلها واجف يمك يكلك أحنه ما ينرد نأثر على مشكور ... يعني نحلها ودي

سليم – عفيه عليك ملّه هذّال ... ولا آني أكدر أخلي الشرطة تنبشها للقرية لكن أخاف يتوازى اللي خاطف مشكور وباللحظة الأخيرة

وردة – لا ... لا أخوي أبشاربكم مشكور أبشواربكم

هذّال – أخوج اليوم ألكاه يعني اليوم ألكاه

سليم – أتوكلوا على الله

{المشهد الرابع}

{في حفرة مظلمة مشكور مكتوف اليدين وملقى على الأرض}

"يدخل مجبل بصحبة صفوك السركال وعذاب"

مجبل – أنته ولك ... شنهي هالعين الصلفه اللي عندك ما حسبت باللي راح يجره عليك

مشكور – أبو راهي اللي يكصد الجواد بكلب صافي ونية صافية ما يخاف لأن يدري بنفسه ما راح ينظام

عذاب – هذا الحجي تغشمر بيه على غشمه غيرنه ...

مشكور – آني هم ما قاصدك بيه ... ولد الأجواد يعرفون نفسهم

عذاب – "يركل مشكور ركلة قوية" ولك هم عايل وتشتم بينه

مجبل – "يصرخ" عذاب ... شتكول علينه الناس؟! يعذبون أسيرهم

عذاب – محد راح يكول ... لأن هالساع أخليه يودع الدنيا

مجبل – عذاب أشو كمت تحجي بمجاني وتقرر حياة وموت .. جا آني شنهي بويه فحل توث لو شيخ عشيرة

عذاب – شيخنا وتاج راسنا .. ليش محفوظ أنته عندك غير راي

مجبل – السالفه ما هي هينه يعذاب ... أولاً مدير الناحية مفتش باللبن ويعرف أولها وتاليها ... وثانياً آني المسؤول الأول والأخير بهذي السالفه وآني اللي أكول

عذاب – لا تتهاون بحكنه يابو راهي ... صحيح الجلمه جلمتك والراي رايك بس ندري بيك كلبك رهيف بساع تتهاون

مجبل – المثل يكول ... الف عين لأجل عين تكرم ... خلينه ناخذ وننطي وياه بالحجي ونشوف غايته بهاي اللعبه شنهي

عذاب – والله يا بو راهي ما لازم نضيع وكت

مجبل – الصبر يعذاب .... الصبر .... "يتوجه الى مشكور" ولك هذا رايك لو راي أهلك

مشكور – هذا رأيي ... أهلي ما يدرون آني هسه وين

مجبل – ما تخاف من تحجيها ... اللي مثلك يكول غير اللي تكوله يجذب ويكول أهلي يدرون حتى دمه ما يروح هدر

مشكور – خوف الزلم عيب يا بو راهي وآني صدكت وياك وناطر حكي منك؟!

مجبل – ولك يا حك ... جاينه متخفي مثل اللي ناويله على نية شنهي غرضك أشرايد

مشكور – أبو راهي يعرف آني عليش جاي ... أختي صارلها سنين بديرتكم ويوم أظلم من يوم يمر عليها ... والغرض واضح ومكشوف تردون واحد من أخوتها يتورط ويجي لهنا حتى تاخذون ثاركم من عنده .... مو هذا غرضك يعذاب ... وآني جيتكم

عذاب – وأنته شمدريك أحنه أمخططين لهذا اليوم

مشكور – الحر تكفيه الإشارة يعذاب

عذاب – لازم أخبار أختك توصل الك يوم بيومه

مشكور – ماكو خبر ينظم ... وولد الحلال هوايه

عذاب – قصدك نكالة الحجي

مشكور – اللي شفته بعيوني برهن الي كل شي سمعته

عذاب – وشنهي اللي سمعته

مشكور – وردة تتريك بالسوط وتتغده بالمكوار وتتعشه بجموع ودفرات .... هاي شيمتك يعذاب هاي المروه يا بو راهي ... أتخلون حرمه كسيره مظلومه طعم ألنه ... آني جيتك يا بو راهي وسوي اللي تريده ... مو هذا غرضك ... آني جدامك

السركال – عمي أرخصني خل أكطع لسانه

عذاب – لا .... خليني أكطع أنفاسه أرخصني يا بو راهي

مجبل – لا ... مو هسه بعد

عذاب – جنك ناوي على غير نية

مجبل – خلونه وحدنه ... روحوا شوفوا شنو الأخبار ... وأرجعوا بساع ...

عذاب – بس محفوظ تره ..

مجبل – عذاب سوي اللي أكلك عليه .... ما أريد أتعجل ويه هذا الأسير القضية مو هينه يعذاب "يشير لهما بالخروج"

"يخرج الأثنان ويتركان مجبل ومشكور"

"مجبل يبدو عليه الأرباك مشكور ينظر إليه بتمعن"

مشكور – اشوفك مرتبك يا بو راهي

مجبل – آني .... مرتبك .. ؟! عوزك تكول عني خايف

مشكور – وأكثر خوفك من نفسك

مجبل – أشجان جنابك ينتظر من هالورطه الورطت روحك بيها

مشكور – الموت على أقل تقدير

مجبل – أقل تقدير "يضحك" أنته ما تخاف أشجابك

مشكور – ظلمكم لأختي جابني وأظن جانت هاي غايتك يا بو راهي ... هيجي المراجل يا شيخ مجبل؟!

مجبل – لا تظن آني جنت موافقه لعذاب ....

مشكور – بس جنت غاض النظر عن كل أفعاله ... بلكي يجي اليوم اللي يتورط واحد من أخوة وردة وتاخذه الحمية ويهد عليكم ويوكع بالمصيده ... وأجه اليوم بس أجه أخوها اللي رافع راية السلام أجه اللي خيب ظنك أجه بدون سلاح بدون حقد بدون غيض أجه من باب واسع وجبير شافته كل الناس وحجه ويه كل الناس وحبته كل الناس

مجبل – "ينهض ويتجه صوب مشكور .... ويخرج سكيناً من جيبه ويسير الى مشكور ويفك قيده" أنطيني أيدك .... "يقطع الحبل"

جان كلتلك روح ... بس عذاب ما يعوفك إلا وأنته ميت أبقه أهنا أأمن لك لمن أشوف درب آمن يوصلك لهلك

مشكور – ويا هو اللي كالك آني أدور على طريق آمن يوصلني لهلي لو هذا غرضي جان ما جيت لهنا

مجبل – ولك طركاعه ألفت لهلك جا شتريد؟

مشكور – آني أختاريت طريق وعر وهو أسلم طريق لأن بنهايته خير للجميع

مجبل – بس كلي سالفة العنف ما أدري اللاعنف ضد المرأة هاي منين جبتها

مشكور – أنته تدري المرأة تمثل نصف المجتمع ...

مجبل – هاي اللي ما تخش بدماغي

مشكور – نعم أشكلت

مجبل – طبعاً المرأة فد شي مهم بحياتنه تخبزلنه وتطبخلنه

مشكور – المرأة نصف المجتمع ... والنصف المهم أيضاً .... والفعال فإذا جابهناها بالعنف وظلمناها وغيبنه دورها وضيعنه حقها راح يعج المجتمع بالأوبئة والأمراض الإجتماعية وأول هذي الأمراض العنف اللي ما ندري وين يودينه

مجبل – يعني ظلم المره يسبب كل هذا العنف اللي نشوفه بعيونه

مشكور – نعم يسبب كل هذا العنف اللي أنعاني منه لأن شيء يقودنا لشيء ... الشعوب المتحضرة ....

مجبل – أيباه ... جا أحنه وين وهاي الناس وين ... عود هم نصير ونكول صرنه

مشكور – نصير ونتخطاهم .... أبو راهي أحنه أصحاب حضارة عريقة وجذورنا بالتاريخ أقدم من كل الأمم بس أحنه أنظلمنه أكثر من اللازم مثل ظلم أختي وردة ... لذلك نهضتنه راح يصير بيهه أشويه تعثر لكن أنطلاقنه راح يكون اسرع وأبعد وراح أنشاء الله أنحقق اللي ما حققته باقي الدول والشعوب

مجبل – الله يسمع من حلكك ... أكول أشو أنته شغلتني ولهيتني ونستني حتى ثار أهلي ... والله لو يدري عذاب جان شهك ومات

مشكور – "يضحك" شيخ مجبل أنته إنسان طيب وخوش آدمي

مجبل – أحنه تقشمرنه تقشمرنه بقى بيها طيب ، أسمع إبن الحلال آني راح أتوجه على مدير الناحية وأخبره بكل شي وراح أوديلك أختك وبتها ...

مشكور – وعذاب؟!

مجبل – عذاب لا تخاف منه راح أخليه جدام عيني أودعناك

"يخرج مجبل"

مشكور – إيه ... أشكد حلو الؤام والتراضي .... الله بعد كل هذي السنين وبعد كل هذيج الضغائن والأحتقان يرجع كل شي لمكانه .... الله يهدي الباقين وعلى رأسهم نسيبي عذاب

"يسمع صوت خطوات تقترب"

ها هذا يا هو اللي أجه ... كل شي ولا عذاب ...

"يدخل خضير وهذّال .... مشكور يختفي"

هذّال – ولك ما تكلي وين جايبني

خضير – هذا آخر زاغور من زواغير عذاب وصفوك ... إذا مالكينه أخو وردة ... خلي أهله ينصبون صيوان الفاتحة

هذّال – أتعوذ من الشيطان خضير ... ودور منا منا بلجي نلكاه

خضير – ولك ما تشوف ظلمه ودليلها الله ... وشلون ظلمه ترهب

هذّال – همزين آني ما أشوف حتى ما خاف من الظلمه

خضير – أي أنته أمكضيها ظلمه بظلمه

هذّال – آني أعمى عيون مو بصيره ... أنته أعمه بصيره وقصير نظر

خضير – يابه ما تكلي بصيرتك شجاي تخبرك

هذّال – بصيرتي أتكول أكو واحد ثالث ويانه بهذا المجان وبصيرتي أتكول هذا الثالث اللي ويانه هو مشكور أخو وردة .... وأدعي من ربي العزيز الجليل يجعله بخير وسليم ومعافى ...

خضير – وشمدريك مشكور هنا ... أشلون شفته

هذّال – حسيت بيه

مشكور – عفيه ملّه هذّال

خضير – ها ولكم صدك جذب

هذّال – شفت ... الحمد لله على سلامتك أستاد مشكور

خضير – ولك أشلون عرفت

هذّال – شميت عطر غريب بالمكان ... تذكرت وين شامه

خضير – جلب بوليسي ... ولف دوك

هذّال – ولك غلط لا تغلط ها

خضير – كافي عاد خلي نفتهم من أستاد مشكور منهو الجابه الهل الزاغور

مشكور – السركال وعذاب نسيبي

هذّال – يا ألله عاد ... هم رجلك وشوفلك طريج لهلك

مشكور – لا مجاني أهنا آمن ...

هذّال – آمن ... أشلون وأنته محبوس

مشكور – مجبل – فك جتافي وكال لا تعوف هذا المكان

هذّال – مجبل؟!

مشكور – أي مجبل ... أبو راهي

خضير – عجيب ... ولكم يا ناس آني راح أيصير إبراسي شي

هذّال – والله هاي المرجيه من أبو راهي ... آني أكول ... هالزلمه بيه كل الخير ... بس أخ أخ من رفقة السوء ... أخ الداير مدايرة مو خوش .... العيب مو بالسلطان .... العيب بالحاشية

مشكور – فعلاً ملّه هذّال أبو راهي زلمه طيب وإبن خير بس مثل ما يكولون جان ماخذته العزة بالأثم بس أنتبه وعرف خطأه وين .... رجع الأصله وضميره

هذّال – خضير روح وره أمل وأمهه خلهن يجن لهنا ... فرح كلوبهن خطيه

مشكور – أي والله خضير بسرعة

خضير – هسه أشوفهن وأجيبهن لهنا

"يخرج"

هذّال – كلي شنهي الصار بينك وبين أبو راهي

مشكور – هذا الرجال سريرته نظيفة ونفسه طاهرة ومدير الناحية أستاذ سليم من كلي تعال والله كريم جان واثق من موقف أبو راهي