_________   يتبع __________

سليم – يا جماعة ... بلدنه بطور التكوين وعلينه كلنا جبيرنا وزغيرنا واجبات ومهام جسيمه .... وكل واحد من عدنه البلد محتاجه ومحتاج همته واللي يكول آني شعليه ويا هو مالتي هذا مو من عدنه أنتو دتشوفون التحديات من قبل مجاميع الإرهاب أشدتعمل بالبلد .. لازم كلنه نوكف ونتراصف أيد بأيد ونفوت على الإرهاب كل الفرص ...

هذّال – (يهمس بأذن خضير) ولك خضير هذا الحجي مدري بيا قناة سامعه يوميه يعيدوه علينه

خضير – آني خو سمعته أبيوم واحد بسبع محطات

هذّال – كل المسؤولين ورؤساء الأحزاب يحجون ضد الإرهاب وثاني يوم الناس منثور دمها على الحيطان ... جا منو اليدعم الإرهاب

سليم – اللي يدعم الإرهاب يا ملّه هذّال اللي ما يرد للبلد الأستقرار هذّال – ومنو اللي ما يريد للبلد الأستقرار

سليم – أعداءه

هذّال – ومنو همه أعداءه

سليم – عدة قوى ظلامية

هذّال – أستاد أنته جاعد ويانه لو بتلفزيون وجاي تسولف آني من كمت أسمع هالحجي بالتلفزيون أكل لولدي طفوه ... خلونه نحجيها بالجلفي وطك بطك عمي الناس أبيناتهه ما عدها شي الحجي حجيكم يالمسؤولين ويا زعماء الأحزاب كلكم تحجون عكس اللي بكلوبكم ومخلين هالناس بنص الرحه وأنتوا ولا هامكم...

مجبل – هذّال ولك أنته وينك ووين السياسه ... وبعدين أشلون ترفع صوتك على الأستاد مدير الناحيه وهو جاعد بربعتنه

هذّال – لا يا بو راهي آني ما قصدي على أستاذ سليم ... أستاذ سليم أشعنده رجال مدير ناحية لا من هذا الحزب ولا من ذاك آني أقصد الكبار

سليم – خليه يعبر عن رأيه بكل حريه ... وجهة نظره صحيحه وصائبه ميه بالميه

عذاب – ولكم ما ضنتي هالأعمه بيه كل هالبلا

هذّال – راح تشوف الأبله يعذاب ... (يحدث نفسه) آنه الك

  "يدخل السركال يهمس بأذن الشيخ"

مجبل – يا الله يا جماعه غداكم حاضر يا الله باسم الله

هذّال – عجلوا يا جماعه الزاد شايلته الملائكة

مجبل – يدخل داخل المضيف تفضلوا تفضلوا ...

"ظلام"

"إنتهى الفصل الأول"

"الفصل الثاني"

"المشهد الأول"

"نفس المكان السابق وقد أنتهى الجميع من تناول الغداء ما عدا هذّال وخضير لم يخرجا من المضيف ... ميري ومدير الناحيه سليم يقلبان في مجموعة من الأوراق الكبيرة .."

ميري – والله يا أستاذ سليم إذا هذي المشاريع كلها تنفذت أحنه بألف خير ..

سليم – مو بس هاي المشاريع هذي مشاريع عاجله أكو مشاريع بعيدة المدى يمكن ما راح تبقه ارض بور بالمنطقه ...

ميري – ما شاء الله ..

سليم – ليش أكلك نريد همتك ويانه .. شوف (يريه ورقة) شوف هذا مشروع مصب لكل هذي الأراضي ... ها بالمناسبه هذا الشخص مقدم على تعيين عدنه بالمديريه والوزارة موافقه وبقت موافقتنه خريج نفس دورتك .. تعرفه؟!

"ميري ينظر في أمر التعيين وبهمس مسموع"

ميري – مشكور

سليم – تعرفه ؟! لا لا منين أعرفه

سليم – بس هذا من نفس أختصاصك ونفس الدورة

ميري – أي بس ما أعرفه ... أستاذ سليم عندي شغله وياك أريد أنبهك عليهه لو تجي وياي ..

سليم – بسيطه من أترخص من الجماعه أجي وياك ...

مجبل – عذاب شوف خضير وهذّال وين صاروا أشو طاحوا فد طيحه

عذاب – "ينادي" هذّال .. خضير

"يخرج خضير وهذّال وهما يتلذذان بطعم الزاد ..."

هذّال – والله لو ما الخبزات ملحن زايد جان ما ردينه شي من الزاد

خضير – يا شويه أصلاً الخبز مالح صبر

مجبل – "يتنحنح" أحم

هذّال – كلك أحم

خضير – بس أحنه ما يهمنه مالح ماصخ

مجبل – "ينظر الى عذاب" شنهي السالفه عذاب وين عصايتك وعينك الحمره اشوف خربطه بزاد الضيوف

عذاب – أحسبه علي أبو راهي اليوم أكسرلك أضلوعهن على هالغلطه

خضير – آنه شفت الأستاد مدير النايحه

هذّال – الناحيه ... الناحيه ... أي شبيه الأستاد المدير

خضير – ما أكل وخصوصاً الخبزات اللي يمه ضلن على حالهن

مجبل – "محاولاً تغيير الموضوع" هذّال أكعد وسولفنه شلون من رحت أنته وخضير للزيارة وشصار بيكم

هذّال – عمي أبو راهي اليوم أشبعكم أسوالف وضحك بس آنه ظل بالي يم الأستاذ أخاف ما شبع

سليم – لا الحمد لله اللهم يديمه عليكم صحيح الخبز مالح شويه بس عاشت الأيد اللي الخبزته ..

هذّال – اكو سالفه يسولفوهه أهل كبل

خضير – أي بالله ملّه سولفه سوالفك حلوة

هذّال – يكلون يا محفوظ السلامه والبكه، فد يوم من الأيام ... غزت قبيله من القبايل ... قبيله ثانيه ... وغنمت ما غنمت منهم وأسرت ما أسرت من نساء وأطفال ... وتعرفون قبل اللي يتأسر يصير عبد مملوك للذي أسره ... جمع شيخ العشيره الأسرى وجمع أبناء عشيرته حتى يقسم الأسرى بيناتهم .... وجانت بين هالأسرى حرمه شابه جان الها شان جبير بين اهلها وكرايبها .. شيخ القبيله ظل يراقب النسوان و... شافهن يلوذن بهذي الحرمه وهي تباريهن وتبرد كلوبهن .. عرف من هاي بأن هذي الحرمه موش مره عاديه ... واحد من فرسان القبيله ... همين عرف هالشي .... صارت رغبته ورغبة الشيخ وحده بأن تصير هاي الأسيره من نصيبه ... الشيخ ما بين غرضه وتنازل للفارس عن الأسيره .. عرفت الأسيره طبع الشيخ ورغبته بيهه لكن الشيخ يفضل رغبة فرسان القبيله على رغبته ... الشيخ والأسيره واحدهم فهم الثاني ... وقبل ما تروح الأسيره لدار الفارس ... طلبت من الشيخ أتظل ضيفه عنده ويه أهل بيته 3 أيام ... وبهاي الثلث أيام ... راوت الأسيره للشيخ وأهله أنواع الطبخ والأكلات ... وعرفوا من هذي الثلث أيام اللي عاشتهن أبيت الشيخ .... العز والأصل اللي جانت عايشه بيه عند أهلها ... وقرر الشيخ يخيرها وما يجبرها على شي ما ترغب بيه لأن الحره صعب تنظام ، يعني جان الزاد عباره عن رساله

مجبل – "بعصبيه مكتومه" عفيه عليك هذّال بس هاي السالفه مالها رباط

هذّال – أبو راهي ... يكولون الأمثال تضرب ولا تقاس ... وأكو سالفه شهودهه بيهه وأكو من يكول أياك أعني وأسمعي يا جاره

عذاب – شنو قصدك ولك

مجبل – "بصوت مكتوم" عذاب لا تنسه روحك

خضير – بويه أنوخذنه ولك هذّال أسكت عاد كافي

سليم – ليش أتسكته بالعكس سالفته حلوه ... بس آني حسيت وهو يسولفها أكو واحد يركض وراه

خضير – قصدك خايف أستاد ... لا هذّال ما يخاف وعليمن يخاف على شوف عينه "يضحك بسذاجه"

سليم – "يدور بنظره حول الوجوه فيرى أنها تغيرت ... ميري يلمح له بالإنصراف"

أكول أبو راهي وعدتونه بسوالف حلوه من ملّه هذّال ... أشو ماكو بس سالفه وحده وكل شي ما إفتهمنه منهه

عذاب – الحمد لله

سليم – نعم شكلت

مجبل – استاذ سليم هذا هذّال دورات تختلف عنده الأمور ويكوم يحجي شامي عامي ... بس دورات تطلع منه حجايات حلوه الظاهر اليوم جثر بالزاد وأنتخم وينراد نكص اذانه

  "يضحك الجميع مجامله"

هذّال – عمي أبو راهي ... رايتك بيضه وأنعم الله عليك ... شنهي طلي ...

خضير – لا أفرار ... (يضحك)

ميري – "محاولاً الخروج من دائرة الأحتقان الذي حصل" أكول هذّال أشلون من رحت ويه خضير للزياره ... سولفلنه بروح أبوك

خضير – ما يسولفها بالصحيح يحجي بس اللي إله ما يحجي اللي عليه

ميري – لا لا أحنه نريد اللي يسولف يجي اللي إله واللي عليه

هذّال – والله واحد مثلي أمين بالسالفه ما مش هينوب، أسوكها بتتناتها

ميري – أي بالله أشلون

هذّال – بويه أول ما رحنه لكربلا لكينه الدرب مسدودج نزلتنه السيارات يم السيطره ... كربناها مشي آنه وخضير ... فد واحد من هالناس اليمشون ويانه كال يا جماعه آنه أندل طريج قريب يوصلنه بساع .. آنه شمدريني ما أشوف ... كلت لخضير ها خضير شتكول ... كال يا الله وراه ... وراه ويمشي الرجال وأحنه وراه ... ما أحس إلا خضير أختفى أيدي جانت على جتفه على غفله ظلت أيدي معلكه بالهوا وما أحس إلا واحد يهز أبرجليه ويسحبني سحب للكاع طخيت عليه ولنه خضير ماخذ وضع إنبطاح ويصيح أنبطح ملّه أنبطح ... كلتله ليش أنبطح كال مو هذا موقع مال أمريكان أنبطح ... كلتله وإذا كال مو أكو قطعه مكتوب عليها ممنوع الوقوف قطعياً ..

"الجميع يضحكون"

خضير – شمدريني آنه شفت هذا الأمريكي موجه البندقيه مالته علينه وصارت القطعه كبالي ويه ما شفت القطعه سمعت الأمريكي يصرخ آنه عبالي يكلي أنبطح ... وأنته يا ملّه

هذّال – أسكت ولك أسكت أش أش

ميري – أحجي خضير أحجي شسوه

خضير – طبينه زرنه وأندعينالكم ... وره ما طلعنه من الصحن ... ردنه ندور على مجان نرتاح بيه الدنيا حاره أشويه وهذّال ما يكدر يمشي يسحل بروحه سحل ... شفتله مجان كعدنه بيه وكلتله آني راح أدور على مجان ناخذ بيه كسرة نوم .. كالي روح ..

هذّال – تدرون وين خلاني وراح

خضير – وآنه شمدريني شفت ناس جاعده هنا وهناك كلت خلي أجعده نوهم واروح أدورلي على مجين

هذّال – والله ما أدري يا هو اللي بينه أعمى ... بس آني بوكتها جنت أشوف خيال

سليم – وين كعدك

هذّال – ما أحس ولن سواده بصفي مالت عليّ ولزكت فد لزكه بيه ها ... هاي حرمه آني أول مره ستانست وكمت أغلغل بيها بعجوسي ... بعدين شميت ريحه مو زينه والعياذ بالله نفرت منها زحفت أشويه لن الحرمه طاحت عليه فد طيحه ... بس شني ريحتهه كتلتني ولج يا معوده وخري ليغاد ... ها ... ما أكدر أعوف مجاني وأكوم خاف يجي خضير وما يلكاني

خضير – لا أنته جنت مكيف عليها

هذّال – ولك يا مكيف أكله ريحتهه أمخمخمه .. لهناك وأجه خضير روح كمل خضير

خضير – لكيت ملّه هذّال جاعد يم جيس مال زباله أسود ويندس بيه ويكله خاله ما تكومين عن الشمس مو ريحتج فاحت

"الجميع يضحكون"

هذّال – جا شمدريني بيه جيس زباله أعمى ولا على الأعمى حرج

ميري – استاذ سليم اذكر أقوى تعليق سمعته من واحد بمناسبة موت الأميره ديانا

هذال – إيه ألف رحمه تنزل على رويحتها ... خوش مره ... غدروها الأنكليز

سليم – لا تنسينا التعليق شكال بالله

ميري – جان هذّال يجي يمي أقراله الجريده اجه يوم اللي العالم كله تناقل خبر الوفاة ... هذّال صافن يسمع وآني أقرأ ولمن خلصت وطويت الجريده ... جرهه حسره وكال إيه ... هاي نهايه اللي تمشي وره واحد مصري

"الجميع يضحكون"

هذّال – وهاذي شذكرك بيها ..

ميري – ما ناسيها ولا راح أنساها ... لأن قويه شتكول استاذ سليم

سليم – والله الطرافه والنكته مطلوبه بهذا الزمن

هذّال – جا أسمع هاي أستاذ .... حميد إبن أستاذ ميري الزغير ... فد يوم سألته كلتله إذا كبرت يعمي شتصير ... شال راسه للسمه وطكهه صفنه وكال .. إذا كبرت أصير شايب

"يضحك الجميع"

عذاب – أستاذ سليم أبو هذال الله يرحمه جان عنده سوالف حلوه وهذا خضير كلهن يعرفهن

هذّال – عذاب عوف الموته خليهه بيناتنه

خضير – سالفه وحده ونبطل ... فد يوم أبو هذال أشتره نعال جديد ليش ما واحد يشوفه ينجبر بيه ويبوكه .. أبو هذال ما كال باطل سوه روحه ما مهتم ... كلوله أشو ما مهتم لبوكة النعال كال طبعاً ما أهتم لأن حتما ً راح أعرفه للبايك ومن أعرفه راح أسوي بيه مثل ما سوه أبويه من أنباك أنعاله من سمع بهذا التهديد الحرامي خاف وأجه رجع النعال ... بعدها سألوا أبو هذال كالوله شسوه أبوك من أنباك أنعاله كال راح حافي للبيت

"الجميع يضحكون"

هذّال – يكلون خضير جان عنده طلايب هوايه من جان زغير

خضير – أولاً آني ما جنت أهنا من جنت زغير ... لأن آني بزغري ربيت عد خوالي

هذّال – جا انته وين أنولدت

خضير – بالمستشفى

هذّال – ليش خير يا ستار جنت مريض (يضحك الجميع)

خضير – ولك امي جابتني بالمستشفى

هذّال – أدري بس اتشاقه وياك ... فد يوم أجاني خضير وكالي أكلك ملّه بلجي تدليني على طريج أكدر أتوفق بيه وأخلي الناس كلها تحتاجني ... أريدن جاه يصير الي عند الناس أريد الناس كلها تحتاجني ... كلتله سهله آني أدليك

خضير – ملّه كافي لا نسولفها لهاي

عذاب – لا ولك سولفها يهذّال

السركال – هاي بالذات سولفها

ميري – لتخاف هذّال سولف

هذّال – منو كالك آني أخاف ... ها بعد عويناتي ... كلي أريد الناس كلها تحتاجني – كلتله راح أدعي الله يكلبك بريك لأن الناس كلها تحتاجه

"يضحك الجميع"

منكلتلك لا تسولف على أبوي قبل أبساع .. ما أحترمت الموتى وسولفت

ميري – زين أنته ما تعرفلك سالفه على أبو خضير لو تستحرم

هذّال – آني ما أعرف ... بس الأموات الهم حرمه

ميري – هجي ولو وحده

هذّال – لا يخوي آني من الموته أتهيب

ميري – هيجي أكو سالفه يكولون ابو هذّال أول مره يصعد بطياره

هذّال – أي هاي هو وأبوي من راحو لمكه

ميري – أي سولفها

هذّال – أي من كامت الطياره تطس بالهوى شيسمونها

ميري – مطبات جويه

ميري – أي مو صارت بيها هاذي المطبات الجويه يكولون جنها طسات أبو خضير على أساس هو معميل للخطوط الجويه ويدري باللي يصير فك حلكه ونطق

ميري – أشكال

هذّال – كال ها بنجرت أنشالله

خضير – أي وأبوك من جابتله المضيفه الصمونات المديوره الزغار وحطتهن كباله عمص عينه وعوج حلكه وكال للمضيفه ها أنشاء الله ما خابزات اليوم

هذّال – اسأله كله أخوك ليش ملبس سيارته جادر

ميري – ليش

 هذّال – مو مسجلهه باسم أمه

خضير – لهنا وكافي هذّال

مجبل – ولكم كافي موتونه

سليم – أستاذ ميري آني اريد أروح بس مو قبل ما تكلي على شغلة الموقع

هذّال – استاذ ميري عندي سالفه أخيره بس الك أسولفها

خضير – كافي عاد

هذّال – خضير بس هاي "يأخذ ميري على جانب" شوف الأستاذ أفتهم شي من السالفه لو لا

ميري – دير بالك هذّال أريدك تضيعهه على مجبل وعذاب وراح أحاول أخلي مشكور يتنكر ويخفي ملامحه

هذّال – روح مالك شغل بس أريدك تضحك ضحكه قويه (يضحكان) هاي سوالف خضير

خضير – مو كلنا كافي

ميري – يا الله أستاذ سليم توكل بالله

سليم – يا جماعه الكعده وياكم حلوه بس خدمتكم والسهر على راحتكم عندي أحلى

مجبل – الله يوفقك أستاذ سليم ويكثر من أمثالك.

الفصل الثاني – المشهد الثاني:

{أمام الكنطره ... نفس المنظر الذي ظهر في الفصل الأول .... سليم وميري يدخلان وهما يلتفتان ....}

سليم – خير أخ ميري أكو فد حدث مهم ... أشو آني بديت أتشوش شنو القصه

ميري – خلي بالك يمي أستاذ سليم ... تره بيدك تمنع كارثه

سليم – يا ستار خير شنو القصه

ميري – مشكور ...

سليم – مشكور ؟...

ميري – الشخص اللي كلت عليه طلع تعينه عدنه

سليم – أشبيه ... آني جنت متأكد أنته تعرفه؟

ميري – حق المعرفه ... هذا أخو زوجة عذاب

سليم – شنو يعني

ميري – زوجة عذاب فصليه ... عوض عن جتل ... وإبن عم مشكور هو القاتل

سليم – بديت أفهم ...

ميري – مو كل القضيه تنفهم

سليم – حسيت أكو خلط بالموضوع ... حجايات هذاّال ونظرات التحذير من عذاب ومجبل .... فهمني ميري شنو ملابسات الموضوع

ميري – وردة زوجة عذاب اللي هي أخت مشكور نختنه نتدخل ونوصل صوتهه الك لأن هالمسكينه أنظلمت هوايه وهي صحتها مو تمام

سليم – وشنو اللي بيدي أسويه ... كل اللي أكدر عليه ضمن حدود القانون وبس ... يعني وردة من تشتكي إذا وقع عليها ظلم أو حيف ... بذاك الوقت آني أكدر أتدخل بحكم القانون

ميري – بس وردة ما تريد تشتكي

سليم – بهيجي حاله ما أكدر أتدخل ... تدخلي هذا يصير ضد القانون

ميري – والحل ... أكو جريمه راح تصير ... أخو وردة مشكور هذا ناصبيله فخ بس يوصل ينكتل ... أكثر من 15 سنة مجبل وعذاب يخططون لهذا اليوم ..

سليم – معقوله ؟! معقوله الشر أحباله أتطول وتمتد لكل هالمده

ميري – القضيه شابجه حضرة المدير وبيدك إتفل عقدها ... مشكور لازم يرد لهله ... وحتى مشكور يرد لهله لازم نواعده بحل قضية وردة أخته ...

سليم – قضية وردة إلها حل ... بس حلها طريقه طويل ... أحنه عدنه برنامج تعاون وتنسيق مع منظمات المجتمع المدني ... راح تجي عدنه لجان وورش حتى تدرس وتناقش مشاكل المرأة بالمجتمع والعنف اللي يمارس ضدها وهذي الورش راح تقوم بتوعية أهالي الريف وتبصيرهم بضرورة رفع الحيف ونبذ العنف ضد المرأة وآني واثق من النتيجة راح تكون لصالح وردة لحظه وحده (تلمع برأسه فكره) ممكن نستغل وجودمشكور بهذي القضيه

ميري – شنو قصدك؟

سليم – بعدين تفهم

ميري –  ومنو راح يحضر هذي الورش ... مجبل وعذاب؟

سليم – راح أجبرهم يحضروها ... كل أهل الريف لازم يحضرون.

الفصل الثاني – المشهد الثالث:

{مشهد تعبيري – يفضل أن يعرض في خيال الظل أو بطريقة أخرى يرتئيها المخرج .. عن نشاط منظمات المجتمع المدني يقف المحاضر فيها أمام أهل القرية موضحاً سلبيات العنف ضد المرأة وما هي الأخطار التي تحيق بالمجتمع إذا تفشت هذه الظاهرة ونسمع من الحاضرين تأييد وإعتراض ونسمع وردة تسأل وكل الشخصيات التي ظهرت تسأل وتعترض وتؤيد ... وبعد فراغ الأستاذ من محاضرته ... يتضح أنه مشكور ... "تنتهي المحاضرة وينصرف الجميع ما عدا مشكور وسليم}"

مشكور – ها أستاذ أشلوني

سليم – أسكت وخليها محاضر ومتمرس في عمل ......... وورشات العمل ومقنع جداً

مشكور – وآني بالأصل مهندس زراعي

سليم – نعتقد شخصيتك ما مكتشفه لحد الآن

مشكور – محد يعرفني غير وردة أختي وبتها وميري جلوب

   "يخرج سليم ومشكور" ويدخل مجبل وعذاب وصفوك السركال

عذاب – أكول محفوظ

مجبل – كول يعذاب

عذاب – أنته راضي على سوالف مدير الناحية وهذا الأستاد أبو الأمن المتحده ... شنهي حقوق مرأة شنهي توكف وردة كبالي تلاسن

مجبل – عذاب هذوله بياعة حجي وأحنه علينه أنبين جدامهم أنه أحنه شرايه ... ولا تنسه هدفنه أجبير أشوفك خدرت يعذاب ونسيت أحنه شناوين

عذاب – لا والله محفوظ آني انسه أخوي ورفيج صباي ... بس هذا أبو الأمن المتحده جاي يفتر على بيوت السلف ويجمع شكاوي النسوان ... أشلون ترضه غيرتك محفوظ تخلي زلمه غريب يهومش بين البيوت

مجبل – الزلمه ما بين منه كل عيب وبعدين وياه ثنين نسوان هنه اللي يجمعن الشكاوي وجدام الناس كلهه وبعدين هذا أمر الحكومة وأحنه ما نكدر نتلاوه ويه الحكومة ... ثم السالفه كلها حجي بحجي ... توعيه وإرشاد ... شنهي اللي مخوفك؟!

عذاب – أبو راهي آني مو خايف آني مليان غيض من وردة ... أحس بيها عِلا صوتها وكامت تتطاول عليّ وعليك

مجبل – معلوم يعذاب وإلها كل الحك وحده كظت 15 سنة من عمرها بالظيم والقهر ... شتريد منها شلون تتصرف من تشوف نسمة نفاهه وناس تتآزر وياها

عذاب – هذا مو حجيك يا بو راهي

مجبل – هذا واقع الحال

عذاب – وننسه غرضنه اللي نوينه عليه

مجبل – ومنهو كالك آني ناسي

عذاب – جا لشوكت نبقه ننتظر يجينه واحد من أخوتهه حتى

مجبل – صفوك

السركال – بلي محفوظ

مجبل – عيونك وين

السركال – عيوني تحوم هنا وهناك داير مداير الفصليه وبتها وتشمشم أخبار أهلها وأخوتها وبس ما أشم خبر واحد جاي منهم ... أنفذ اللي التفقنه عليه

عذاب – والأمن المتحده هذوله أشلون بيهم

مجبل – أشويه أنهدي جدامهم ومن يرحون شد يعذاب يا الله أمشينه

"يخرج الثلاثة"

"بعد فترة"

"يدخل ميري ومشكور تتبعهم وردة وأمل"

مشكور – أيه والله وكت يا ميري

ميري – مساكين

مشكور – منو همه المساكين

ميري – أحنه

"أغنية لكريم منصور"

في أثناء الأغنية "تذهب وردة وتدخل دارها وتبدأ بشجر التنور بينما تقوم أمل بمساعدتها .... بينما مشكور وميري يقفان بعيداً خشية من عيون مجبل ........ يقفان قرب الكنطرة ... يتجاذبان الحديث ... أمل ... تحمل قدحاً كبيراً من اللبن وتسكب منه لخالها ولميري يتناول الأثنين اللبن ..."

ميري – مشكور يا خوي آني كلش خايف عليك

مشكور – كلها أشكم يوم وتخلص مهمتنه ونرجع لهلنه

ميري – آني أفكر أبحل لقضية وردة حل نهائي

مشكور – الحل بيد عذاب ومجبل

ميري – مجبل وعذاب نيتهم غير نية ... مشكور خلي نروح لبيتي خليك بعيد عن بيت وردة ... كربك منها يثير الشكوك

مشكور – وآني هم كلش بعيد ... آني ما أروح لمجان إلا بشورك وما أوكف بمجان إلا أنته توكف بيه

ميري – جا غير أريدك تشبع شوف من أختك وبنت أختك

مشكور – خويه ميري آني هم ما أريد أسببلك إحراج ... يالله أمشينه

"يخرج الإثنان"

"تنتبه وردة لذهاب أخيها"

وردة – خالج وينه

أمل – يمكن راح هو وميري

وردة – لوين