لا يجوز طبعها أو تناولها مسرحيا أو الأقتباس منها دون العوده إلى مؤلفها والأتصال به على  البريد الألكتروني e_ altlal@yahoo.com  أو رقم الجوال 07801068372ومن يخالف ذلك يتعرض للمسائله القانونية التي ينص عليها القانون المحلي والدولي لحماية حقوق الأعمال الأدبيه والفنيه

 _______________________________________

 مسرحية

وردة وعذاب وأمل

  تأليف – إحسان التلال

  إخراج – علي المطبعي

_____________________________________

-تكملة - ج 2 

----------

أمل – لا يمه لا من اليوم شغل ما نشتغل يمه إنتي مريضه منهو ألي إذا صار عليج شي .. أسمع بويه إذا صار على أمي شي أنته المسؤول ... آني أكولها لدنيه وكل الناس أكول أبوي جان يدري بيها مريضه وجان يجور عليها

عذاب – هيجي صارت ... مريضه المريض يمهلوه يومين ثلاثه يصير زين حتى لا تكولين عني ظالم ... كومي أنتي بواجب أمج

أمل – لا .... لا

عذاب – (يهوي بضربة على ظهر أمل بعصاته) أتأدبي ولج هالنوب إنتي عليّ ... أتأدبي

وردة – دخيلك عذاب عليك أبو فاضل العباس لا تطك بنتي أبوس أيدك

عذاب – إذا يهمج ضلوع بنتيج تبقه سالمه أدبيها وإذا ما تكدرين عليها عصايتي حاضره

وردة – عليك الزهره الزجيه ... عوفها آني آني أربيها الك .. كومي ولج حبي أيد أبوج

   (تنهض أمل من الأرض وتتجه صوب والدها تقف أمامه بتحدٍ)

أمل – وين أبوي يمه

وردة – ولج هالجدامج حبي أيده وكوليله التوبه ...

أمل – (تأخذ بيد والدها وتضعها على خدها) أشكد أتمنيت هالأيد تجيسني من أتمرض تمسد بشعري ..... اللي واحد يهضمني .. ما تمنيتها تضربني وتضرب أمي ..

وردة – يمه كليله التوبه حبي أيده وكليله التوبه .. ولج يمه ستري عليه وعلى روحج

عذاب – (يراقب ما تفعله وردة تترك يده تسقط عن رأسها وبدون أن يتأثر) عفيه بت وردة ... حيه ركطه مثل أمج .. جاسماتها للسالفه أمج طكطكتلهه جم جلمه حتى تراضيني وإنتي ردتي تكسرين كلب أبوج بهالحجايتين ... ولجن آني عذاب ما تمر على شاربي هالسوالف .. أسمعن أنتن الثنتين .. مدير الناحية الجديد اليوم خطار عدنه ما أريد صوتنه يطلع بيجن بخت ترى لو ما الخطار جان خليت العشيره كلها تسولف بيجن، يالله شوفن شغلجن

   (يخرج)

وردة – كومي يمه عينيني ترى رجليه ما تشيلني

أمل – يمه أرتاحي ... وخدمه ما نخدم بعد

وردة – ألطم على راسي أوشك زيجي ... يمه أبوج يذبحنه اليوم إذا عاندناه

أمل – يمه ما يصير تسكتين على هذا الظلم حرام

وردة – شبيدي أسويه وما سويته

أمل – كل شي نكدر نسوي ... ودي على عمي ميري ... أكتبلج مكتوب لخالي مشكور

وردة – ميري هم أبتله الرجال ... وبعدين خالج أشيكدر أيسوي ... الرجال والمره محد يتدخل بيناتهم

أمل – يمه لازم ما نسكت كافي يمه آني راح أموت من القهر

وردة – أسم الله عليج يمه

   (صوت هذّال وخضير)

هذّال – يالله يالله

وردة – منو هذا

أمل – هذا هذّال وخضير

وردة – هم رجعوا

هذّال – أي رجعنه ... أم أمل ... من رحت منا .. ظليت أفكر بالحجي اللي سمعته منج ومن أمل ... وتردين الصدك هالأبن الحلال خضير أجه وذبله حجايه أبأذني ...

أمل – شكلك خضير

هذّال – كلهن شكلتلي

خضير – كلتله ملّه الساكت عن الحق شيطان أخرس

هذّال – وآني ما أرضى أصير شيطان أخرس

خضير – لا أخرس وأعمى النوب

هذّال – فكرت وفكرت شفت أحسن شي نحجي أبسالفتج اليوم جدام مدير الناحية

خضير – أي مو اليوم مدير النايحه يجي يم شيخ مجبل

هذّال – الناحية نايحه تنوح عليك وعلى بزرك

وردة – أشلون

هذّال – أريدج تملحين الخبز زايد

خضير – خلي الخبز مالح صبر

هذّال – ولك يا صبر تريد أتموتنا نصنه بينه ضغط ... أريدج تخلين ملوحة الخبز تلفت النظر يعني تصير بيها سالفه بالمضيف وآنه الباقي عليه .. راح أروح يسره وأرجع يمنه وأصعد وأنزل لمن أخلي مدير الناحية والخطار اللي وياه يعرفون بقصتج .. ومن توصل سالفتج يم مدير الناحية تصير غير شكل وعذاب بعد ما يكدر يمد إيده عليج

وردة – صدك ملّه

خضير – خليها على الله وعلينه ... أحنه اليوم ناوين على نيه لعذاب بس الله يدري بيها .. (يلاحظ وردة تتألم) أكول خويه أم أمل شمالج تلوين براسج خير خو ماكو بيج شي

وردة – الخير مال عذاب فاح علينه قبل ما تجون

  (يهرع الأثنان بسرعة البرق يتجهون نحو الكنطرة)

أمل – هاي وين

هذّال – كون عذاب جان هنا .. هله ... بالله لو جايين كبل بساع

خضير – جان راح جلدنه للدباغ

أمل – عمي خضير جاوين النيه اللي ناويها اللي بس الله يدري بيها

خضير – هو راح

أمل راح

هذّال – هم يرجع لو لا

أمل – لا ميرجع

هذّال – متوكده

أمل – ما يرجع

هذّال – (يضرب خضير) ولك ما تكلي شمالك تتناكث جنك شجرة أبوسط ريح

خضير – وأنته .. فررر ولا جنه أعمى من سمع طاريه .... شلع شلعه البي أم فررر

هذّال – يالله عاد يالله خلي نروح .. مثل ما وصيتج خويه أم أمل ملح زايد

وردة – صار ... ملّه هذّال كبل ما توصول للربعه .. مروا بميري جلوب وكله وردة تسلم عليك وتريدك أبشغله

هذّال – صار جا ميري شعليه بهاالسالفه .. ترى كل شي ولا ميري يعرف اللي التفقنه عليه

وردة – ملّه معقوله أتوصيني ألّي ... آني أريد ميري يحجي ويه طرف ثاني

خضير – هم بيها نوع من الصح .. خلينه نوجها وجوج بوجه عذاب

هذّال – والله لا أثبرها ثبيرة التركتر من يحرث الكاع أسودنه اليوم

أمل – إش .... إسكتوا

هذّال – شكو

أمل – يمكن صوت أبوي

   (يهرب الأثنان ويختبئان خلف الكوخ)

 

- ظلام -

المشهد الثاني:

(في مضيف الشيخ مجبل ... يقف في وسط المضيف السركال ويحمل بيده قطعتين مختلفتين من الكاشي البورسلان يتفحصهما ... بويه شني هالسليعه ولكم صدك هذا يبلطون بيه الكاع .. وشلون أمشي عليه جفيلكم العباس مية مره أتجوم بالكاع ها .. خايبين ولكم وين شافين أحنه هيجي موزايك)

 

"يدخل ميري"

ميري – ها صفوك أشبيك تحجي ويه روحك وهذا شنو ... البيدك

السركال – هذا موزاييك للمضيف الجديد مال عمي مجبل

ميري – ولك وين أكو موزاييك بالدنيا بعد .. هذا منتوج حديث من الكاشي أسمه بورسلين ..

السركال – أها .. جا ما نعرفه أحنه بس أشويه أسمه ثكيل على اللسان

ميري – (مبتسماً) أشويه ثكيل .. زين كول ورايه بورسلين

السركال – يابه نعرفه ..

ميري – دكول بورسلين

السركال – بوو ... شكلت

ميري – أشكلت كل شي ما كلت يالله مو تكول أعرفها

السركال – بوو  بوو

ميري – بعد كمل بس بوو بوو بورسلين

السركال – بورسبلين

ميري – رحمه من الله همزين

السركال – ميري أنته هالأيام تتهزل وتضحك عليه شنهي غايتك

 ميري – ما تعرف تحجي وحاط نفسك بكل شي

السركال – أي ما أعرف أحجي خاف كالولك أنته صرت مهندس زراعي ترى جفيلك العباس أنته كل شي ما تفتهم لا بالهندسه ولا بالزراعه

ميري – أولاً آني لا اليوم ولا أمس ولا قبل أول أمس ولك صارلي أكثر من 17 سنة من تخرجت من الكلية وثانياً ما أشتغلت بهالشغله وحتى أكول أفتهم لو ما أفتهم ... آني فائدتي من الشهادة خليته لروحي أستثمرت كاع أبوي وجدودي وخليتهن أها ما شاء الله عامرات وفايحات بالخير .. هسه أفتهم لو ما أفتهم

السركال – قحط .. هي كلها شهادة كلية الزراعة بأبو غريب .. جا لو جايبهه من لنده جا شحملك عمي

ميري – منين ؟! لو جايبها منين ؟!

السركال – من لنده

ميري – النون مال لندن وين وديتها .. ولك عمي هاي لندن ما سامع ماجد سرحان المذيع أشلون يكولها بترس حكلة هنا لندن وأنته أتكول لنده

السركال – أسمع ميري لا تظل تهاوش بلسانك وياي أنه رجال على حد تمكيني أكول الجلمه مثل ما يلوكلي ...

ميري – هسه معقوله كول آني ما أعرف مو عيب المايعرف أنعلمه

السركال – عمي لا تعلمني ولا أعلمك عوفني بتتناتي هيج أنه راضي

ميري – (يضحك) يابه روح أنته وتتناتك ... أكول صفوك جاوين الجماعة أشو تأخروا شنهي السالفه ...

السركال – مدير الناحية أخذهم غاد حذا السايلون

ميري – وين ؟!

السركال – نو السايلون

ميري – هاي النون مال لندن ليكيناها شالها وخلاها على السايلو

السركال – يابه تروح (يخرج غاضباً)

ميري – تعال صفوك .. تعال

السركال – "يمعود" شتريد والله لو ما آني محترم مضيف عمي جا فلا أسكتتلك على هال هال ... عمي أنته شنهي تتمهزل علي؟

ميري – صفوك آني أتشاقه وياك ... والمثل يكول من حبك لاشاك

السركال – عمي سايم الله عليك لا تحجي وياي .. آنه دمي نار أروح أسويلي عمله وياك وشيفضج يا طلابه ..

ميري – آنه أخوك .. لا عمي لا آني من هاي الناحيه أجبن من أسماعيل ياسين وبعد لا أحجي وياك ولا أندك بيك

السركال – أي وبعدين آني جزع لا يتجزع من هيبة عمي شيخ مجبل يعني جزع من هيبة العشيرة

ميري – (يضحك بقوة) جزء مو جزع .. هنيالك مجبل على هالهيبه .. ثم تعال إذا أنته جزع لا يتجزع من هيبة العشيرة أشلون عايف عمك وحده ويه ناس غربه متخاف عليه ..

السركال – عمي هو اللي رخصني وكالي روح غاد أبقه بالمضيف أخاف يجون جماعة سوي الواجب وياهم

ميري – جا ما تقوم بواجبي صارلك ساعة تهد وتفلت عليه بسيطه خلي يجي عمك وآني أعرف شأكله

السركال – أنته مو غريب يا أستاد ميري .. آني عمي كلفني على الناس الغربه

  (يدخل خضير وهذّال الى المضيف)

هذّال – يا الله يا الله ... السلام عليكم

ميري – وعليكم السلام .. هله هله بملّه هذّال

خضير – أشلونك صفوك

السركال – والله زين

هذّال – أشلونك عمي أبو راهي "يسحب يد ميري ويقبلها"

ميري – هله بهذّال

هذّال – هذا منهو

خضير – هذا ميري

هذّال – والله عبالي شيخ مجبل ... جاليش تخليني أحب أيدك

ميري – ما أريد أحرمك من البركه كلت خله يحب أيدي بلجي يتوفق بلجي يروح منه العمه ويفتح عيونه

هذّال – ها ... ليش بويه صاحب مزار لو صاحب بخت ... عمي لو أدري بعويناتي تفتح على يد ميري جان أجلتها لأيده بالبوس "يأخذ يد ميري ويقبل بها بسرعة" جني كمت أشوف ... اللهم صلي على محمد وآل محمد ... شفت ولكم كمت أشوف

ميري (يضحك) ولك أنته مو ملّه شاذي

خضير – يمعودين هذا صدك كام يشوف

ميري – يابه دبطل ...

خضير – هسه يبين الصدك من الجذب .. ولك هذّال

هذّال – ها خضير

خضير – "يشير الى السركال" هالسواده الواجفه على يمناك شنهي هاي ... منهو

هذّال – "ينظر صوب السركال" هذا العجل الناذره شيخ مجبل للرضا عليه السلام

السركال – تخسه

خضير – ليش يخسه تحلم أنته عجل للإمام

السركال – ولكم يا ناس هذا الحجي ما يرضى بيه الله ... شنهي حايط نصيص على كد أيديكم .. لا هالسالفه ما ينسكت عليها آنه أروح يم عمي وأحجيله كل شي "يخرج"

   (الجميع يضحكون)

ميري – والله عليك سوالف يهذّال

هذّال – شوفه راح

خضير – ولى راح

هذّال – آني ردت أهزمه منا قبل لا يجون الجماعه

ميري – شنو غايتك منها

هذّال – ميري ... وردة رايدتك تمر عليهه

    (ميري يرتبك)

ميري – وشرايده مني وردة ... وشعليه آني بوردة

هذّال – الله أعلم ... بس اللي أدري بيه هالحرمه مظلومه يا ميري وأنته وآنه وخضير بيدنا نعينها

ميري – آني شبيدي عليها .. وبعدين إبن عمها هو اللي جتل أبنه ... هاي هي تكوم تكعد هي فصليه واللي يسويه وياها عذاب حك وعين الحك

هذّال – ها ... جا موش أنته خريج كلية ومتعلم وتعرف الحك والدين

ميري – أنته ما جان هذا رايك يهذّال ...

هذّال – والله يا ميري كل أحنه نعرف ونحرف ... وندري وين الحك .. وين الباطل بس نمشي باللي يصرفلنه .. خوف الله ماكو

ميري – هاي سانيتنه هالشكل والسانيه دستور العشيره وأنته أعرف من غيرك بهالقضيه يهذّال

هذّال – السواني خلتها العشاير حتى تحمي بيها حك المظلوم أكول خو ماكو أحد غيرنا هنا .. أشو آني أخذت راحتي

ميري – أخذ راحتك آني وأنته وخضير ..

هذّال – خضير أنته وحدك لو وياك شياطينك

خضير – عمي وحدي شياطيني شنهي

هذّال – يعني اللي تسمعه أهنا ما ينكال بغير مجان

خضير – عمي آني لا أرى لا أسمع لا أتكلم

هذّال – أسمع وشوف بس لا تتكلم أبو أبوك أوجه إذا حجيت

خضير – عمي ما أحجي ... ترى هاي زايده منك يهذّال أدري موش آنه اللي جبرتك على سالفة وردة وكلتلك لازم أنعين هالحرمه المسكينه

هذّال – هاك تفضل على روحه فتن .. ولك أسكت ولك لا تفلت حجي

ميري – (يضحك) يعني هي ليش أختارتني بالذات

هذّال – يمكن أكو صلة بينك وبين شو منو ما أدري

ميري – ها .. ترى آني من يوم الحادثه قطعت علاقتي بمشكور أخوها

هذّال – أي .. فلتها والله .. ولكم يا جماعه طلع أضرب من خضير ... يا مشكور وين مذكور

خضير – أها عرفته مشكور أخو وردة اللي جان وياك بالكلية

هذّال – أي والله تذكرته .. من جانت عويناتي عندي شايفه وياك بأيام الكلية

خضير – أي وهو الوحيد اللي عارض أهله وعشيرته حتى ما ينطون وردة فصلية لعذاب

هذّال – ولك خضير أحنه طلعنه آخر من يعلم

ميري – ولكم أستروا عليه .. آني ما عليه بيه آني أنقطعت علاقتي بيه من يوم الحادثه لا شفته ولا شافني ..

خضير – يمجن المره هسه تريدك أتشوف أخوها

ميري – عمي وين الشوفه أحنه أبينه دم

خضير – ميري يا دم السالفه صارلها 16 سنة والمره ولدت وجابت بت ... وره كل هذا العمر لهل الوكت ما شايفه أهلها

ميري – هاي السالفه محد جبرها عليها أبسانيتنا الفصليه من تولد تكدر أتروح لأهلها

هذّال – المره الحره ما ترضه بالضيم يا ميري حتى لو جان من أكرب الناس إلها

خضير – جا رضت أبظلم عذاب وصبرت عليه ولأهلها شوف ما راحت شافتهم

هذّال – الكاسر ظهر وردة بتها أمل ... أم أولادي دورات تروح يمها تطيب خاطرها تسمع منها حجي

ميري – شتسمع؟!

هذّال – الحجي بيناتنه يا جماعه عذاب ما رايدها لوردة ولو حاصل الود والرضى بيناتهم جان جسم أيامه بينها وبين بت عمه .. هي ليله وحده جمعهم سكف واحد .. وبعدها بدأ عذاب يجور وينتقم وبهاي الليله الله قسم الها هالبت اللي صارت أمل

خضير – والله يا جماعه آني كلبي يتفطر عليهه ودورات أعظ على أصابعي من القهر وأكول هم صوجهه هي هم عنوديه .. حكها ما تريده

ميري – يا حك خضير متكلي يا حك

خضير – ليش وره ما جابت وصار عدها بنيه ما راحت لأهلها تشوفهم جان على الأقل تغير ت دنياها

ميري – مجبل وعذاب راسمين خطه ... ووردة ذكية وتعرف عذاب ومجبل أشظاميلها

خضير وهذّال – أشظاميلها

ميري – التدبير تدبير مجبل والتنفيذ عذاب ينفذه

خضير – قصدك الجور والظلم اللي وردة تشوفه من عذاب

ميري – أي يا خضير هو هذا

هذّال – وشراح يستفيد مجبل من ظلم حرمه

ميري – يستدرجون واحد من أخوتهه حتى يوصل لسلفنه وبيها ياخذون الثار ... الحجي بيناتنه يا جماعه

هذّال – هذا الكلام منين سماعه

ميري – ما سامعه بس هذا أستنتاج ... والحر يفهم ... ووردة هالأنسانه البسيطه عرفت وحست بهالشي  ولهذا السبب هجرت أهلها ورفضت حق من أهم حقوقها

هذّال – مسجينه يا وردة .. أستاد ميري هالحرمه واجب مساعدتها روح شوفها شتريد

خضير – الله بعونها أهلها ظلموها .. وعذاب ومجبل ظلمها تره صعبه .. شتكول ملّه هذّال

هذّال – (يغم خضير بيده) اهم هذا اللي الله كدرك عليه صعبه وستوه دره بيها صعبه

ميري – السواني تجور بس مع الأسف مو ويه المرتكب ويه المتعلقين بيه

هذّال – وهسه شراح تسوي .. شنو اللي تكدر عليه

ميري – ما أكدر أسوي من اللي سويته قبل .. جنت أودي أخبار وردة لأخوها مشكور وأجيب أخبار مشكور لوردة .. بس مو بشكل مباشر أكثر من هذا ما سويت

خضير – أحنه ناوين على شغله

ميري – شنو هي

خضير – نريد نوصل هاي السالفه لمدير الناحية بس بالحسجه

ميري – يا جماعه ترى مجبل لو عذاب إذا حسوا بشي يكلبون الدنيا على راس هالمسكينه وبتها

هذّال – ما راح نخلي السالفه طالعه من وردة راح نخلي مدير الناحية هو اللي هو يتحرك .. أنته بس خليك منتبه ويانه

ميري – متفهموني شنو نيتكم

هذّال – ماكو وكت يمكن الجماعة وصلوا

خضير – أي والله هذوله هالجايين علينه

ميري – يعني ما راح تخبروني على اللي راح تسووه

هذّال – خليك حسوس أستاذ ميري وإفهم كل جلمه أكولها ... بعد ما تصير سالفه على الخبز المالح فك أذنك زين

ميري – خوش .. الخبز المالح (يسمع صوت شيخ مجبل ومن معه وهو يرحب بقدمهم الى مضيفه)

مجبل – تفضلوا .. تفضل أستاذ سليم شرفتنا اليوم

سليم – أنته الشرف أبو راهي .. آني اليوم هوايه مسرور بهذا اللقاء الحقيقة أكو هوايه أشياء إيجابية حدثت بالناحية وطبعاً هذا بفضل تعاونكم ويانه

مجبل – تفضلوا تفضلوا (القادمون يسلمون على الذين في داخل المضيف)

مجبل + سليم

السركال – عذاب – السلام عليكم

هذّال + ميري + خضير وعليكم السلام ورحمة الله وبركاته

هذّال – هله هله ومية هله بالأستاد والله زارتنه البركه

خضير – شلونك عمي

سليم – أنتو الخير والبركه (يجلس الجميع يتبادلون التحايا)

ميري – يا هله ومية هله بأستاذ سليم

سليم – شلونك أستاذ ميري .. ها ما غيرت رايك وتجي ويانه تشتغل ..

ميري – ما تكلي شأشتغل

سليم – أمامك منصبين مدير زراعة الناحية .... أو مشرف عام على المشاريع الزراعية اللي راح تنطيها الدولة كمصاطحة للفلاحين ... وبصراحة أكو منافسين الك لأن الوزارة قدمتنه أشكم أسم لكن رأينا هو المهم وآني أفضلك الك أولاً لخبرتك وثانياً لأن أنته من أهل المنطقة

ميري – والله يا أستاذ آني لو رايد الوظيفة جان تعينت من زمان وبعدين كاعي وحقول الدواجن ما كادر أكفيهن هالنوب مشاريع دولة ..

سليم – أنته مو وحدك أستاذ ميري راح يجون وياك أكثر من عشر مهندسين من مختلف الأختصاصات أنته عليك تشرف وتوجه وبس ..

ميري – تريد الصدك أستاذ .. الوظيفة عند الحكومة ما أرغبلها

سليم – أنته بخيالك حكومة كبل .. الواقع تغير أستاذ ميري .... أحنه بدنيا جديدة ووضع جديد .. قبل جان حصار ومي ماكو عدد ماكو إنفتاح على العالم ماكو .. هسه الوضع أختلف .. كل شي إذا ما متوفر راح يتوفر ... الأمور يوم بعد يوم تتحسن

هذّال – والله أستاذ آني أشوف الأمور يوم بعد يوم ليوره

مجبل – ها ... ولك أنته منينلك عيون حتى أتشوف

هذّال – قصدي أحس .. صحيح ما عندي عيون بس عندي أحساس

مجبل – وإحساسك شكلك

هذّال – إحساسي أشوف بيه الأراضي الزراعية جاي ياكلها الأهمال يوم بعد يوم والمساحات المزورعة جاي أتقل يوم بعد يوم رغم توفر الماي وهذا كله بسبب الحكومة

سليم – نورنه ملّه هذّال ... كلامك هذا بيه نوع من الإتهام بالتقصير

هذّال – موش تقصير بسيط وإنما تدمير للزراعة

الجميع ها ... (يتعجب الجميع)

عذاب – أستاذ سليم هذا هذّال مخرف ويحجي شامي عامي لا تخليه يدوخك تره كل حجيه ما إله أساس

هذّال – عذاب آني مخرف ... خلف الله عليك

سليم – يا جماعه خلي نسمع ملّه هذّال شنو رأيه ويجوز بيه نوع من الصحة .. الدولة مشخصة عدة أخطاء وهي في طريقه لعلاج هذي الأخطاء

هذّال – بس الخطأ اللي آني حاس بيه ما يتعالج يا أستاذ

الجميع – شنو هو

هذّال – شرهان آل جسام .. عنده 16 ولد من ثلث نسوان كلهم