من أبن الولاية إلى مومن الثلمة مع كل الأسلحة الثقيلة والخفيفة ردا على هجمته المباغتة لنا من عكد اليهودي...!!
_______________________________

____________________________ 

يالمومن عُبَرْ حَدّه التَراخي وياك 

تِحَفه من تطب للبير أترجاك

________________

ما مالوف حجي البيه نعل ومداس

مو حسجه القنادر تنثر عالناس!!!

لو كشخه ومهابه تلبسه فوك الراس!!

تتفاخر يمومن بالقبغليه!!؟

يا هو الكال تِشْكِمْ لو طَلَبْ حِله؟

خيالك بيه كَمُلْ مِحْتاج يتفلّه

يَمومن خَلْهَا سَكْته وميّز الشغله

المطنب حَضرْتي لا تِمُر بيه

ظَلْ أذرع شَوارِع مِيّةْ ألف مَره

جيب شهود كل زُوّارَها الحَضْرَة

مِنْ راسِي وشِنِيكي ما تِهز شَعْرَه

تَحَالُفْنا أزَلْ مُوُشْ أأتِلافِيّه !!!!

لو شَابَتْ الدِنْيا ورَابْ بِيها الماي

يظل بيها وِفه شِمَا بَدِلَتْ وَيّاي

صِعْلُوك التَرَافَه أنْخِطَفْ مِن عَيناي

ومومِن تَبَتي يتمقلج عليه

ولك ياحِسْجَه هاي البِيها تِتْبَاهَه

وجِلْمَات التِجيس شهودها وياهه

أخَربُط باللعب ؟! وتْكول سَواها!!

ترّه ما تنسه الدَكَة المَشِهْدِيّه

لَتْعِيل أبْعِشِرْتِي أسنين باريتك

هَرْفِي ومَي لَحَمْ وِعْرُوُك عَسَيتَك

(دَحِشْ مَاي) إشْرَبِتْ فَدْ يَوُم مِنْ بَيتَك

نَمَنْ دُوزِي وامَيّه غَزِرَنْ بِيّه!!!

إبِنْ ذِيج النِواحي البِيهَه بَيتَك جان

تِعيّرَه أبْجورِتَك, غَمْ جُورَة المِعدان

التِمِعْدِن مو نَسَبْ, بَسْ طَبُع بالأنسان

 تِعَيّر امريكي بأفعال الشروكيه!!؟؟

يتباهه الشُمَصْ بالدنيا يوم بيوم !!

عِمَتْ عين البَصَلْ شاخ عِلّه عَمَه الثوم!

ألف (عفرين) عالدنيا إِشْتِلَبْس هدوم!!

ابكانون الرجيف ابوزره مَكضيه!!

مَكْضيه الحياة وبيها مِتْنَعْمين

مَثروده وبَصَل والناس مِرتاحين

كُومه مِن العِمايم كِلْبَتْ الصوبين

دِسايسْكُم كِضَتْ كُل العراقيه

ما دسيت حالك إلا بالتخريب!!؟

يا مومن نِحَذرَكْ, مَرّه وَحْده تصيب

رِدِتْ الصلح مِنَكْ ما شفت تَرحيب

عَليّه وعلى شِنِيكِي تِهدْ يوميه

يوميه أعلمك وأجزي حد الحد

غُصْنك بالمَوَده ساعه ماوَرد

بَسْ شِفْنه القَنادِرْ للسما تِصْعَدْ

قَبَغْلي وجَفِت, ُروغان وجلد حيه

لا تِنْخَه ابْشِنيكَكْ ماتِجِدْ عِنْدَه

الماي العلى جفوفَك راح وتبده

كِرَط مِلحَكْ أبو السَنْدوس واتْعَدَه

وعِرَفْ ساسَك رَمُل, مومن اللوتيه!!

لَتْحَشِمْ أبو السندوس عالأخوان

لوحاته درَسْ ...كل باحث وفنان

من ينغث ما يسلم, من عمى الألوان

ويرجع بك يعيش ويه العركجيه

مو بس بالعرك يكضي حياته النوب

حشيشه ومي تتن يتكاسر المشروب

والحِسْجَه الكلتها تِنْكِتِبْ عالرُوبْ

بِنُومَه وصَحْوِتَه يِقراك يُومِيّه

ما يِدْمِنْ عَليك وطَبْعَه يِتْبَدَلْ

على صِعْلُوك الجِدَ يّدَه تِريدَه يتْحَوَ ل؟

ياهو الدثو البينه؟ وياهو صار أثول؟

ولك للشط تتبعه,وما تجد ميه

ماعندي عِوايدْ أشتِم الأصْحاب

لَجَنْ حَجْي العَوَجْ مِنْ كِلْ كِتِرْ ينعاب

موبَس مُومِن الثَلْمَه عَلَيّ كَلابْ

إحْجِي بالحُكُومَه الكُلْبَت اعليه

كِلْبَت هالحكومه وبَيّسَت بينه

وَعْدُونَه بشَمِسْ... بالظلمه ظلينه

خَمْس سِنِين ما تِرسَوا صِوانِينَه

شوَكت ريّا تنه تشم هوه الحريه

___________________

                                           إبن الولاية
___________________________

_______________________________________

___________________

اين الرد يامومن الثلمة لقد تأخرت كثيرا